మరియు స్ఫటికమువలె మెరయునట్టి జీవజలముల నది దేవుని యొక్కయు గొఱ్ఱపిల్ల యొక్కయు సింహాసనమునొద్దనుండి ఆ పట్టణపు రాజవీధి మధ్యను ప్రవహించుట ఆ దూత నాకు చూపెను. ఆ నది యొక్క ఈవలను ఆవలను జీవవృక్షముండెను; అది నెలనెలకు ఫలించుచు పండ్రెండు కాపులు కాయును. ఆ వృక్షము యొక్క ఆకులు జనములను స్వస్థపరచుటకై వినియోగించును.” ప్రకటన Revelation 22:1-2
“చెట్లులేని మెట్టలమీద నేను నదులను పారజేసెదను. లోయలమధ్యను ఊటలను ఉబుకజేసెదను. అరణ్యమును నీటిమడుగుగాను ఎండిన నేలను నీటిబుగ్గలుగాను చేసెదను.” యెషయా Isaiah 41:19
పల్లవి : సర్వోన్నత స్థలంబులో – దేవునికే మహిమ
సర్వాధికారి యేసుని సిలువచే కలిగెను
అనుపల్లవి : సర్వోన్నతుండగు దేవుని – సేవకులై యుండియు
సర్వోన్నతుని చిత్తంబున – సర్వదా స్తుతియించెదము
1. పరలోక యెరూషలేమున – పరిశుద్ధుల సంఘంబు
మురియుచు భర్త యేసుకై – అరుదెంచుచుండెను
పరిశుద్ధ పట్టణమందున – ప్రభు యేసు క్రీస్తుండు
ప్రకాశమానదీపమై – ప్రజ్వలించుచు నుండె
|| సర్వోన్నత ||
2. దేవుని సింహాసనమున – దేవుని మహిమలో
సువర్ణ కిరీటంబుల ధరించిన పెద్దల
జీవుల మధ్యనుండెను – దేవుని గొర్రెపిల్ల
ఘనత మహిమ ప్రభావము – యుగయుగములు ఆయనకే
|| సర్వోన్నత ||
3. స్ఫటికంబు బోలినట్టి మెరయు – జీవ జలనది
పట్టణపు వీధులలో – ప్రవహించుచుండెను
స్ఫటికంపు నది కిరుప్రక్కల – జీవ ఫలవృక్షంబు
స్వస్థత కలిగించును – వృక్షంపు యాకులు
|| సర్వోన్నత ||
4. బండలో నుండి నీటికాల్వల నిండుగ రప్పించెన్
మెండైన నదుల నీళ్ళను – దండిగ పారించెన్
బండైన క్రీస్తును చీల్చెను – ప్రభుదేవుండే మనకు
నిండార నింపు నాత్మను – తండ్రి విధేయులన్
|| సర్వోన్నత ||
5. మెట్టల స్థలమందున – నదుల పారజేతున్
ఊటల నెన్నో లోయల – నుబుకంగ జేతును
నీటిమడుగులుగా మార్చెద – నరణ్యము నంతటిని
నీటి బుగ్గలుగా చేతును – ఎండిన నేలను
|| సర్వోన్నత ||
6. దావీదు పట్టణమందున – దావీదు సంతతిలో
దేవుని సర్వశక్తితో – జన్మించె యేసుండు
దావీదు తాళము కలిగి – తన సింహాసనమందు
తావిచ్చి చేర్చుకొనును – జయించువారిని
|| సర్వోన్నత ||
7. సిల్వలో మరణించెను శ్రీ యేసు నా కొరకు
విలువైన రక్తము కార్చెను – మలినంబు బోగొట్టన్
బలుడైన ఆత్మ శక్తితో – గెలిచె సమాధిని
బలమిచ్చును పరిశుద్ధులకు – హల్లెలూయా పాడెదము
|| సర్వోన్నత ||